الإعلانات

1432/09/19

إنشودة يا ديرتي يا سدير يا اغلى من الماس .. إنشاد عبدالله المهيدب






لا تنس مشاركة الصفحة مع أصدقائك والإنضمام الى متابعين المدونة بالضغط على ايقونة Follow





يا ديرتي يا سدير يا اغلى من الماس
ودك مكن فـي خاطري والتجابه
 
أنت الغلا وانت الوفا وانت الانفاس
أحب سهلك والجبل مع هضابه

ياالله عسى مزن الحيا يرمس ارماس
برقه على القبلة حقـوق ٍ سحابـه

يسقـي ديار ٍ حبها ماله قياس
وادي جلاجل والفقي مـع شعابه

وتربع فياض ٍ من العام يباس
تلقى زهرها فايحات ٍ عذابه

نفحة هواها كل ماهب نسناس
تشفي جروح اللي عطيب ٍ صوابه

يطرب لها اللي من عنا الوقت محتاس
همه يروح ويبتسم له شبابه

أفخر أنا يا سدير وارفع بك الـرآس
لك منزل ٍ بالقلب وايضاً مهابه

دار ٍ لها بالقلب عز ٍ ونوماس
جدي وابوي اللي نشـو فـي ترابه

أهل الوفا والطيب والعز والبآس
من بآسهم تشبع جياع الذيابه

ربعي هل الطولات لا حميت الطآس
مثل الأسود اللي ربت وسط غابه

درب الكرم موروث ساس ٍ على ساس
قولة هلا للضيف يا مرحبابه

له عندنا حشمة وبن ٍ بمحماس
نفـرح إلى جانا عزيز ٍ جنابه

يقوله اللي يبدع القاف باحساس
مثايل ٍ مثل الذهب يعتنابه

والخاتمة صلوا على صفوة الناس
اللي ومر بالخير والشر عابه

كلمات: ناصر العبدالله السعيد
إنشاد: عبدالله المهيدب
الصور من تصوير: عبدالله السويح






ليست هناك تعليقات:

إرسال تعليق

شارك الصفحة مع من تحب